Ongerveurbehoud op waeg noa 3 keer elluf
Wie ut begoosj: “Stichting Onger veurbehoud, Es God bleef” is de naam voloet. De zaate hermenie is ontsjtange oet ein aw tradisie. Vastelaoveszonjig ging namelik ein klein gruupke al sinds de jaore zeevetig opstap in Mestreech. In 1989 waerde op initiatief van Frank Cuijpers (van Meef) beslaote om d’r ein zaate hermenie van te maake. Ut eerste optraeje vong plaats op ut leedjeskongkoer in 1990. De kapel had nog geine naam. Wie Piet vanne milkboer vroog “dot geer mit” zei Har van de Bekker “is good maar waal Onger veurbehoud, es god bleef en de naam dea volgt nog”. Piet schreef de kapel toen in es “Stichting ONGER VEURBEHOUD,ES GOD BLEEF.” Later waerde det “Onger veurbehoud” maar de toevoeging “Es God bleef” is noots helemaol weggewaes en nag altied in os logo truuk te vinge.
De 1ste 11 jaor: De eerste 11 jaor ging ut veural om; doon hoew veer zin in hadde, en neet te veul verplichtinge, alles ‘Onger Veurbehoud’. De sjoon zelfgenejde pekskes en heud, het sminke, aafgekeeke in Mesjtreech, waore os hanjelsmerk. Veer deeje mit aan de bontje aovende en vanaaf ut allereerste moment, aan de boerebroelig auch biej Sjengske oppe zaal. Vastelaoves maonjig trokke veer mit de optoch mit. Allein de zonjig dao kwoom oos neemes aan; toet op de daag van vandaag zeen veer dan te vinge in Mesjtreech. Gaondeweg greujde de groep en waerde lede binne Onger Veurbehoud door Klaus en Paul zelf opgeleid veur ein blaosinstrument. Ongertösje hawe veer de besjikking euver ein geweldig sjoon rippetisielokaal “Biej Giel” oppe Borg hoew veer erg greutsj op zeen. Beschermheer en vrouwe Giel en Truus zorgde good det die maedjes het neet koud krege inne repetitesjtal. Auch kwoome d’r klein kinger biej diej eers mit de bolderker mitgoonge en noe al mitblaoze en al mier beer drinke es de mam enne pap.
De 2de 11 jaor. De volgende 11 jaore waerde onger de leiding van kepelmeister Klaus sjteeds mier aandach aan de meziek gesjoonke. De pekskes wearde almar sjoonder en oetbundiger. Saame mit de vrunj van de Binneste Boete Bandj en de Biemösje noome veer deil aan de Limburgse kampioensjappe zaate hermeniekes (LKZH), en woone 2 kier! Veer deeje mit aan de historische optochte (850 jaor Postert en 80 jaor KPJ in orsjenele harmonie oetfit, mit patsj en pluum) en in 2006 brachte veer os eerste eige CD oet; “Biej Giel” . De Biemösje waerde vergezeld nao boetedörpse resepsies, veer sjpeele oppe resepsie vanne Biemösje zelf en alle jaore doon veer mit aan de optoch op vastelaovesmonjig. Aug zorge veer al bienoa 25 jaor veur de meziek biej de Annendaalloup.
De 3de 11 jaor. Na 22 jaor dich jiddere keer waer oplaaje veur get nuuts, zoe ze dinke det het waal op zoe zeen mit het enthausjiasme. Dus neet. In de verangeringe vanne letste 11 jaor die de vastelaovend van vandaag mit zich mitnumme, probeerde veer os zo good es het ging aan te passe. Altied aangejaag door de ‘kinjer’ van de oudste leeje ginge veer daor. En auch de kleinkinjer gaon weer mit en zitte alwier in die aw bolderker van toen. Nuuj activiteite nome de plaats in van auwe, zowie blaoze inne vastelaovesmis, vastelavend eupene in de Oranjerie oppe zaoterdig, blaoze mit de kennedymars enne kirmis, ‘Bie Liebes’ inmiddels os tweede stamkafeeke. Wat bleef waor de sjpas, duk al vanaaf de start vanne repetities ‘Bie Giel’. Het oetzuuke vanne nuuj stukke. Vriewaal in ein onverangerde samenstelling vanaaf 1989, 33 jaor mit 8 versjillende pekskes in 7 versjillende klure samensjtellinge veur jidderein.
En noe dan os jubileumfees waor veer haer oetkieke. Om herrineringe op te haole en mit Postert same de vastelaovend 2023 in te loewe. Eine gezellige vastelavesaovend mit versjillende optraejes en de presentatie van de nuuj kleure/pekskes van Onger Veurbehoud. 3 x 11 jaor…..waem haw det gedag in 1989. Veer hawte nag sjteeds van vastelavend, dea sjoone zaate hermenie vasteloavesmuziek, maake gaer sjpas en plezeer, kalle nag gaer euver vreuger en…………..veer gaon geweun doer………..es god bleef.!!!!
Zaate Hermenie: Ongerveurbehoud, es God Bleef
Gepubliceerd: 15 FEB 2023 - 19:38